كل ما يحتاج طالب الثانوية العامة معرفته.. من ساعة ما يوصل اللجنة لحد ما يخرج من الامتحان:
أولا: أول ما تدخل اللجنة هتستلم كمامة وكيس مطهرات.
ثانيا: هتدخل اللجنة تستلم ورقة أسئلة وورقة بابل شيت.
ثالثا: كل فصل (لجنة) هيكون فيه أربع نماذج امتحانات.. نفس الأسئلة لكن ترتيب الأسئلة متغير بينك وبين زميلك.
رابعا: ترتيب الإجابات هيكون مختلف بينك وبين زميلك.. يعني ترتيب الأسئلة مختلف وترتيب الإجابات برضو مختلف.
خامسا: هتلاقي رقم كود على ورقة الأسئلة اكتبه بالنص في ورقة البابل شيت.
سادسا: لازم تكتب رقم الكود علشان يبقى نموذج الأسئلة اللي معاك مطابق للبابل شيت بتاعك.
سابعا: لازم يكون معاك قلم رصاص وقلم جاف ومسطرة وأستيكة (مساحة) وبراية.
ثامنا: استخدم المسطرة في إنك تمشي براحة في البابل شيت وتحط الإجابة قصاد نفس رقم السؤال لأن عينك ممكن تروح على السؤال اللي بعده وتعلم عليه من غير ما تاخد بالك.. هنا أهمية المسطرة.
تاسعا: هتستخدم القلم الرصاص في تظليل رقم الإجابة اللي انت شاكك فيها، وفي الآخر تبقى ترجع لها علشان تظللها بالقلم الجاف لما تتأكد منها.
عاشرا: القلم الجاف هو الأساس في التظليل.. واتأكد إنك ظللت الدايرة كلها.
حادي عشر: لو ظللت إجابة بالجاف وعايز تغيرها.. اكتب عليها علامة (إكس).. وبعدها اختار الإجابة الصح.
ثاني عشر: لو عملت (إكس) على الإجابة الغلط واخترت إجابة صح غيرها.. متقلقش.. هنا جهاز التصحيح الإلكتروني مش هيقول إنك اخترت إجابتين.. هنا هو مش هيصحح السؤال ده وهيصدر إشارة حمراء إن فيه سؤال لم يتم تصحيحه.. بعدها هيكون تصحيحه بالعين المجردة (تصحيح يدوي يعني)، يعني لا تقلق هتاخد درجة السؤال.
ثالث عشر: السؤال اللي تحس إنك هتاخد وقت فيه ومش عارف توصل لإجابة صحيحة من الاختيارات.. سيبه وروح للي بعده، علشان الوقت، وبعدين ابقى ارجع له تاني لما تخلص إجابة باقي الأسئلة.
رابع عشر: ورقة البابل شيت هتبقى من صفحة واحدة.. يعني هتبقى عارف انت جاوبت على ايه وسايب إيه مش هتقعد تقلب في ورقة الإجابة.. لأنها ورقة واحدة زي ما قلت لك.
خامس عشر: لو عندك (أنا بقولك لو عندك) وقت سجل إجاباتك اللي كتبتها في البابل شيت على التابلت، لو مش عندك وقت اكتفي بالبابل شيت.
سادس عشر: متقلقش.. البابل شيت لو فيه أي مشكلة وانت مش مجاوب إجابة تانية في التابلت.. هيتراجع تاني وهتاخد حقك كاملا.
سابع عشر: متنساش تكتب اسم ورقم جلوس ولجنتك على ورقة الأسئلة وتكتب اسم ورقم جلوسك ولجنتك ورقم الكود في ورقة البابل شيت.
ثامن عشر: بلاش تختار إجابة في التابلت وإجابة في البابل شيت لنفس السؤال وتقول هما ياخدوا الإجابة الصح.. كده هتاخد صفر على السؤال ده.. ده لو رجعوا للتابلت أصلا.. لأن طول ما فيش مشكلة في البابل شيت مش هيرجع للإجابة للي انت كتبتها على التابلت.
تاسع عشر: لازم تسلم ورقة الأسئلة وورقة البابل شيت للمراقبين.. علشان زي ما قلت لك هيطابقوا نموذج الأسئلة بتاعك بالبابل شيت، لأن النماذج مختلفة داخل اللجنة الواحدة.
عشرون : لو رفضت تجاوب في البابل شيت وقررت تجاوب في التابلت فقط.. انت كده هتتعامل معاملة الطالب اللي مرحش الامتحان من الأساس.. وهتسقط في المادة.. البابل شيت هو الأساس.. متقولش هجاوب في التابلت وأقولهم المنصة وقعت ولازم أخد الدرجة.. انت كده لا هتاخد درجة ولا نص درجة والتعليمات دي وصلت المديريات واتحسمت خلاص.
واحد عشرون: متحاوش تغش ولا تطلب إجابة من الطالب اللي قدامك ولا اللي وراك.. أسئلتهم ترتيبها مختلف عن ترتيب أسئلتك.. وترتيب الاختيارات عندهم مختلف عن ترتيب الإجابات عندك.. ركز في حالك ومضيعش وقت في حاجة هتضرك مش هتفيدك.
ثنتان وعشرون: أسئلة المواد غير المضافة للمجموع تقدر تطبعها من موقع الوزارة ابتداء من يوم 3 يوليو وتجاوب عليها في البيت وتبقى تسلمها للجنة بتاعتك.
ثلاثة وعشرون: عايز تقسم السنة على سنتين انت حر.. عايز تدخل نص المواد وتسيب النص التاني للسنة الجاية انت حر.. التقسيم متاح لأي طالب.
أربعة وعشرون: لو عايز تتظلم على النتيجة انت حر.. التظلم متلغاش ولسه مستمر إن شالله تتظلم في كل المواد.
خمس وعشرون: الحالات اللي يحق لك دخول الدور التاني في المادة بالدرجة الكاملة.. لو مريض كورونا.. لو اللي معاك في نفس السكن (أبوك أمك أخواتك) عندهم كورونا.. لو أبوك لا قدر الله مات.. والدتك لا قدر الله ماتت.. لو حصل كارثة طبيعية.. حريق.. الطريق اتقطع ومعرفتش توصل للجنة.. حادثة.. وهكذا.. كل ده بتعمل بيه محضر رسمي في الشرطة، وتقدم طلب تقول فيه حصل لي كارثة كذا يوم كذا وكان عندي امتحان كذا.. وعايز أدخل دور تاني في المادة بالدرجة الكاملة.. حقك.
ست وعشرون: نسيت أقولك إنك هتدخل امتحان المادة بالكتاب بتاع الوزارة فقط.. كتاب العربي يبقى كتاب العربي بتاع الوزارة، وهكذا.
سبع وعشرون: لو اتمسكت بموبايل حتى لو مقفول، هتتحسب عليك محاولة غش وهتسقط في المادة.. سيب موبايل مع المراقب.
ثمانية وعشرون: لو اتمسكت بموبايل مفتوح هتسقط في المادة وباقي المواد وهتبقى متهم بحيازة وسيلة غش وممكن تتحرم من دخول الامتحان لمدة عام.
تسع وعشرون: لو صورت ورقة الأسئلة ونشرتها علشان الإجابات توصل لك.. هتسقط في كل المواد ومش هتدخل الامتحان لمدة سنتين.
ثلاثون : عايز تدرب على الامتحان صح (أسئلة وبابل شيت)، اوعي تغيب عن الامتحان التجريبي اللي الوزارة عاملاه يوم 21 يونيو.
واحد وثلاثون: أسئلة الامتحانات تلتها للطالب المعقول وتلتها للطالب المتوسط وجزء لفوق المتوسط وجزء للمتميز.. اطمن واعمل اللي عليك وسيبها على الله.
مع خالص تمنياتي بالنجاح: أحمد حافظ
