نتيجة الشهادة الاعدادية بمحافظة المنيا 2021

 بسبب جلطة القلب أو النوبة القلبية فيه حوالي 18 مليون شخص بيموتوا كل سنة في العالم لدرجة إنهم بيسموا أمراض القلب "القاتل الأول للبشر".. الخبر العظيم واللي بقاله يومين تقريباً بتتكلم عنه وسائل إعلام أجنبية وعربية كبيرة وكتيرة 

البطل بتاعه هو الشاب اللي في الصورة ده.. "أنيس حنا".. شاب مصري عنده 28 سنة من محافظة أسيوط، وخريج كلية الطب جامعة إسكندرية سنة 2017.

 "أنيس" من وهو طالب وشاغلاه فكرة إن فيه ناس كتير بتموت بسبب جلطة القلب بدون ما العلم يقدر ينقذ إلا عدد قليل منهم.. اتخرج من الكلية وبسبب تفوقه سافر يكمل دراسة الدكتوراة في كلية طب "ألبرت أينشتين" في نيويورك.

 أثناء وجوده هناك نجح في خلال الـ 4 سنين اللي فاتت هو وفريق بحثي إنهم يوصلوا للجينات المتحكمة في شفاء جلطة القلب!

 يعني إيه؟.. يعني فريق الأطباء اللي بيقوده "أنيس" توصلوا لطريقة حددوا من خلالها الجينات المسؤولة عن شفاء نسيج القلب المتضرر من الجلطة والتهابات وتليف عضلة القلب.. اللي عملوه الشباب دول كان إنجاز ملهم وعمل قلبان في الأوساط العلمية والطبية بره.. تم نشر البحث في دورية "سيركيولاشن ريسيرش" (أبحاث الدروة الدموية)"

 وهي من أهم الدوريات في مجال أبحاث القلب عالميا، وفي الدورية الأمريكية لفسيولوجيا القلب  AJP-heart، ودورية بيولوجيا النسيج الخلوي  Matrix Biology.. مش بس كده ده كمان منظمة القلب الأمريكية " American Heart Association" واللي تعتبر أعلى جهة مختصة بأبحاث وعلاج أمراض القلب قدمت تمويل لـ "أنيس" وفريقه البحثي بقيمة 147 ألف دولار.

 وكمان معاهد الصحة الأمريكية قدمت لهم دعم بقيمة 2 مليون دولار عشان يكملوا أبحاثهم ودراساتهم!.. "أنيس" في حواره مع موقع "سكاي نيوز عربية" مع الصحفي "هشام المياني" قال إن التجارب نجحت على الفئران وهتحتاج وقت من 3 لـ 5 سنين بالكتير عشان يكون عندنا دواء صالح للبشر يخلصهم نهائياً من جلطة القلب والنوبات القلبية بمجرد حدوثها.

 "أنيس" بيحلم إنه ينقل خبرته وكل اللي اتعلمه لمصر، وواثق إن ده هيحصل في يوم وشايف إن ده حق بلده عليه وإنها ماتقلش عن أى مكان تاني في العالم.. المصري يا جدعان لما بيحط حاجة في راسه مش بيمنعه عنها أى حد أو ظرف.. البلد دي فيها شباب دماغهم ألماظ يستاهلوا وزنهم دهب ويستحقوا يتشالوا على الراس.. تسلم إيدك ودماغك يا "أنيس".